Форум » "МАСТОРАВА" МОРОКЕРЬКСЭСЬ » Литературное творчество эрзян. Боляень Сыресь. » Ответить
Литературное творчество эрзян. Боляень Сыресь.
Танюш: Литературное творчество эрзян. Боляень Сыресь. Тетянень, Григорий Петровичнень алтави… Те сон, ды авазо, монь бабам, Матрёна Алексеевна, тейтерь шкане Бутяйкина, кадсть таго-мезе монень тоначис туемадо икеле… Ды те таго-мезесь ве чистэ невтизе прязо, кайсь монь апак кевкстне ды кармавтымим вешнеме ёмавтозенть… Косто вешнемс? Эзь ёвта… Ансяк марявить вайгелест: - Тонсь цёрам… Тонсь… Тетям кадовсь куломазонзо сакулькань эрзякс. Сакулькань «вантай» валось, кадовсь тетянь кельсэнть весе эрямо пингезэнзэ. Раксесть лангсонзо, лиясто, Ташто Селищань эрзянтне: - Ванодо, Вантай моли… Сырявам лемдясь эйсэнзэ «Гиня». Те шкас мряви тень вайгелезэ: – Вай, Гиня с-а-а-сь… Тетянень, алтави… Тетяй, вантай, Теке кивесэ артозь менелесь, Вантай, уить, Чудить стакасто та-косто пельтне. Сиянь байгекс! Кирьга маласо цитни пеелесь, Пелян… Айган… Гайгить удемсэм арсема мельтне. Тетяй, вантай, Ратор томбале раужкадсь виресь, Вантай, эрькесь, Кекшезь Раторонь раужо ведьсэ. Тетяй, рангстан, Кудот сявордозь, килееть чиремсь… Тетяй, ранган, Рузонь кельсэ корты эрзянь велеть! Тетяй, ёвтак, Ков эзь пачкоде янгиця кедесь? Ведь а корштат, Чуди лейтнева наксадо ведесь, Кирдивийсэнть, Рузонь прявтнэ ды рузыязь «мордват». Яжить, пивсыть! Кода раськенть идесынек, кода? … Тетяй, кода? Кода эрямс авидечинть ютксо? Тапазь, кодазь, Теке комолят, витнемс аютко, Чиезь, ардозь, Ков капшатано, кияк а соды…. Симезь, ярсазь, Теке ракшат ютатано модас… Эйдем, содан, Мелявтомась аволь куля ютксто, Майсян, стоман, Каштмолема ашти эрзянь юрсо, Койтне лазозь, Раськесь сюлонзо кирьгас тапари Эрзянь пазось, Рузкс а чарькоди, эрзякс а мари! Ве вайгельсэ, Ансяк саразт пансемс пире пестэ, Кавто вайгельс, Мороськак велень келес маряви, Зярдо раськенть Вейсэ вайгельтне сюлмазь кеместэ, Ансяк сестэ Вешеманок пазонтень редяви! Паряк, саты, Эрямс пульзядо, кумажа лангсо? Аволь стяко, Эрзянь вересь валозь эрзянь сансто! Минек долконть, Кияк миденек башка а пандсы, Эрзят стядо, Ве Бажамос, Ве Мельс, Вейсэнь Морос, Инешкипазось эйсэнек вансты! Боляень Сыресь Киев ош, эйзюрков, 16 чистэ. Лия кельс ютавтомась ванстазь авторонть амеремасонзо. Перевод на другие языки запрещён автором Весе ловнадо тестэ: http://www.erzan.ru/news/literaturnoe-tvorchestvo-jerzjan-boljaen-syres
Ответов - 0
полная версия страницы